向來好有戲味嘅溫總噚日喺澳門出巡，喺澳門政府一班臨記配合下，大做河蟹親民騷，朝早去公園同一班做晨運嘅女士跳扇舞，仲拋出一句「我站得穩」，擺明對地位好有信心。
叫得做影帝，溫總噚日喺澳門出巡當然唔可以悶親觀眾，朝早佢晨操，由澳門市民教授舞技。人哋用右手舞扇，自言「左手靈活一點」嘅溫總就改左手拎起紙扇，但唔係轉錯方向，就係手勢唔啱、fing唔開把扇，遇到「金雞獨立」呢招即時嚟戲，揸扇表現單腳企，雖然有啲左搖右擺，但就大大聲話：「我還能起來，能站穩，我站得穩！」中共體制凡事都有政治解讀，溫總強調自己企得穩陣嘅弦外之音，大家冇理由收唔到：溫總好有信心可以做埋兩年任期。
突殺出半百臨記
難得國家領導人畀面，教佢跳舞位女士即場送一把名為「紫氣東來蓮花太極扇」畀溫總。溫總就接埋場戲，笑住同呢位女士講，叫佢可以聯絡澳門中聯辦，第日退咗休佢會拎住呢把扇相見喎，「在中南海跟你會面」。唔少記者聽到，即時諗起溫總早排發表政改論後，喺中共內部俾人狠批，連《人民日報》都要封殺、唔登溫總嘅政改言論，令溫總噚日喺澳門使出「金雞獨立」回應。
講到好演技，溫總朝早到訪大三巴時，突然殺出逾50個臨記，溫總一到場，全體老臨即時帶動全場齊齊拍手歡呼。八方同事當時在場，就聽到有前日遊行先出現過嘅便衣警察，本身扮緊遊客，但仲要提醒其他同袍「企番自己個位」。
「遊客」反應浮誇
現場所見，有部份人遇到溫總，反應high到連專業老臨都行埋一邊。據聞就搞到有本港電視台都私下嫌太肉麻，擔心播出街會被指做媒，寧願搵過啲平淡啲嘅人訪問。
反應浮誇嘅，其中一位係姓熊嘅廣州女「遊客」。佢話咁啱噚日朝早去到大三巴，又咁蹺獲溫總主動握手後，話即時開心到標眼淚，又話「自己嘅人生已經圓滿咗」，未來幾日都唔會洗手咁話。話時話，中央領導其實都係為人民服務嘅公僕嚟啫，大家千祈咪當佢哋咁高高在上，咪將中央領導當劉德華咁吹捧。
mailto:[email protected]