崔世安舊年宣誓就任澳門特首時，不斷將「本人」說成「笨忍」，笑死唔少澳門同胞。溫總大駕光臨，唔少人估佢會閉門苦練普通話一洗前恥，前晚喺一個晚會用普通話讀出幾百字嘅演辭。澳門當局事先向記者發出嘅新聞稿，明明有唔少地方用上「本人」同個「本」字，但有記者心水清發現，崔世安讀稿時全數避讀，唔係將「本人」變成「我」，就係當稿中「本」字唔存在，令人覺得吹水安的「笨忍」心理陰影仲未消除。
臨時充當繙譯
崔世安普通話差勁，但有樣嘢叫低處未算低。噚日佢陪溫總到一家餅店時，講開廣東話的餅店老闆嘅普通話相當唔掂，竟然一度要由崔世安開口幫溫總繙譯，令人大開眼界。唔知溫總唔好食餅，定聽到差勁普通話心情受影響，佢一塊餅都冇食過，仲一包手信都冇帶走就離開澳門。