溫總噚日到訪大三巴景區，由於地方大兼屬唔少遊客到訪之處，結果成功造就《蘋果》記者創造歷史，以半個遊客身份，喺數個中南海保鑣身邊隔住兩三個人同溫總影相拍片，作近距離接觸。雖然八方同事可近距離採訪中共領導人，但同其他想埋溫總身邊嘅記者一樣，其間不斷被保鑣推開，揹住背包嘅攝影記者，更有人被拉到幾乎出現moonwalk情況。
唔少香港記者見難得近距離接觸溫總，身處澳門都試圖問趙連海被判監嘅問題，但溫總唔知真聽唔到定扮聽唔到，只顧揮手同即時上車。有記者扮遊客混入手信街，諗住再追問溫總，點知問完溫總有乜嘢想同香港人講，溫總答一句「香港同胞好」後，就即時被大班保鑣推走，想再追問趙連海案都問唔到。