「港交所係好有sexappeal！」，呢句話唔係出自李小加或者夏佳理嘅口，而係諸立力──正當港交所（388）挨近200蚊，但又衝極衝唔到線，港人想買又唔係好敢買之時。諸立力何許人也？90年代聯合交易所的上市委員會委員，論輩份，應該高過李小加同夏佳理，家陣行走江湖的身份，係第一東方投資集團董事長。
「李小加睇法好strategic」
「呢隻股係有好特別嘅優勢，unless坐喺度唔做嘢」，睇完港交所行政總裁李小加嘅萬言書話要搞「資金池」後，好多人覺得佢做緊嘢，「港交所因為最近市場嘅發展，一定會有啲突破，作為領導人嘅李小加，he'ssomebodycomingoutofthebox，唔同阿Paul（周文耀）佢哋……所以佢嘅睇法可能比較strategic（策略性）」。
家上海交易所又話要趕上香港，新加坡又走去同澳洲合併，孤伶伶嘅港交所sexappeal到底喺邊呢？「上海嘅崛起係有啲負面……但市場咁大，上海家都話要同香港合作喇，大家市場定位唔同。至於新加坡，形象上對香港係有少少損害到，但唔會有直接影響」。
比起上交所「好玩」
港交所好性感可能係因為呢一點，佢話「畀機構投資者特別嘅機會，海外金融機構、交易所，如果想投資中國，唯一可投資比較有意義嘅銀碼，就係港交所，上海你係買唔到，而香港係法律上買到5%，上海你係同政府玩，香港你係同market（市場）玩，再講，佢（港交所）可以去收購，又可以畀人買，任何一方都有一個sexappeal」。
「（香港）離岸人民幣產品暫時出嚟會比較細，係啱嘅。成功之後，規模就會大，等於H股，畀咗香港一個機遇，ifwegetitright，呢隻股長線應該係好好嘅！」當年帶領紅籌落香港上市嘅真正紅籌之父就係咁睇港交所。