上星期，雖然陸續有銀行上調以銀行同業拆息為基準嘅按揭計劃貸款息率，但另邊廂，稅貸息率就鬥平鬥賣大包。借錢投資似乎係財務策劃師嘅禁忌，財務策劃師檢視客戶財務狀況，一見有債，大部份都會叫你盡快還清，寧願變成「無產階級」，都好過資產中夾雜「正數」同「負數」，目的係慳返利息支出。
「偷」一年時間投資
不過，生意人深明借人啲錢去投資，既可以發大投資回報，投資彈性亦大增。當然一切建基於利息成本低，投資回報有返咁上下。
某間銀行稅貸推廣，免息免手續費，借幾多還幾多，條件係要同時新開指定戶口，同埋只係交幾多稅，就借幾多錢，唔可以借多過稅款。假設你合資格開指定戶口，如果要交5萬蚊稅，透過稅貸，真係可以「零」成本將本來用嚟交稅嘅5萬蚊，留喺自己個荷包嘅時間長啲。
由於明年又有新一年度嘅稅要交，所以稅貸通常一年內清還。換言之，透過稅貸可以「偷取」一年時間，咁不妨諗下將呢筆資金用嚟買隻派息穩定嘅藍籌股，收返幾厘股息。
不過，股票有升有跌，最怕一年過後，股價跌幅大過股息回報率。為咗避免賺息蝕價，所以買正股時順便買返相關期權，或者做返個coveredcall做保險。深入同具體嘅期權策略，要睇本叠嘅《一周期權》，敏妮唔敢班門弄斧。
要贏通脹須先格價
內地人有句口頭禪──「你可以跑不贏劉翔，但不能跑不贏通脹」。空講冇意思，最重要係有實際嘅行動，講慳最緊要做功課，周圍格價兼唔怕行多兩步搵平嘢。不過除咗節流，更需要開源。
溫敏妮
http://wanmanli.com/blogs/