疑似特首候選人梁振英早兩日發表「小平應獲和平獎論」，引起全城譁然，之前頻頻曝光累積嘅民望即時插落谷底，嚇到一向愛發表偉論嘅CY急急封口。噚日佢出席由國際青年商會搞嘅「無窮宴」活動，成班記者追問佢係咪會收番言論，佢一直左閃右避，活動完結拋低一句「我趕時間呀今日」就鬆人。
唔講小平仲有乜嘢水吹？佢上台分享就提到香港貧富懸殊問題，話自己冇仇富，香港多有錢人都冇問題，只係窮人越來越多，所以大家應該出番啲心意幫吓窮人。
話自己冇仇富
好似呢個「無窮宴」，到場既400人就齊齊食價值唔超過一蚊美金嘅午餐，即係白麪包、番薯同粟米，籌到嘅10萬蚊會捐畀慈善組織小母牛。八方見CY食麪包好似好滋味。
CY吹水吹出禍，全國政協委員劉夢熊噚日就話，鄧小平有個凡事不爭嘅理論，因為拗親就會令事情變複雜。好似劉曉波呢件事本身就已經好議論性，CY仲搵埋鄧小平嚟講，即係挑起新嘅爭論，有違小平教誨喎。