運輸署噚日舉行自訂車牌拍賣，推出238個自訂車牌，最後只賣出191個，總成交400幾萬，成績麻麻，原因可能係有啲人唔得閒。
點解八方會咁講？其中一個「LA1M1NG」嘅自訂車牌，只係賣到18,000蚊，可能係因為黎明同樂基兒都好忙啩，所以嚟唔到。「007B0ND」只賣到65,000蚊，睇嚟占士邦亦有任務搞到唔方便出現。
拍賣嘅仲有偉大嘅「BE1J1NG」，都只賣到22萬元，唔通啲愛國富商全部去晒澳門捧溫總場？噚日最高價成交嘅車牌係「LV」，以34萬成交，名牌即係名牌，第二位係27萬成交嘅「DR」，香港啲名醫個個身家豐厚，呢個價應該算超值。