好友神傷多才多藝最愛扮嘢

好友神傷
多才多藝最愛扮嘢

對於羅君左離世,一班《歡樂今宵》(EYT)的舊同事都深感難過。曾與羅君左合作無間的藝員鄧英敏,昨接獲好友死訊時十分傷感,其實他前晚也到過深切治療部探望昏迷中的羅君左。
鄧英敏昨日說:「當時佢口部插喉幫助呼吸,少少反白眼,但面容好平和,好似瞓咗覺。」可惜羅君左難敵病魔,鄧英敏認為天妒英才,「佢多才多藝,做戲、唱歌、司儀、畫漫畫、教配音乜都曉,但50鬆啲就要走,本來可以玩到快樂80歲,但老天爺要佢走,生命係唔可以控制到。」鄧英敏又大讚羅君左為人善良和健談,是個不可多得的好朋友。
盧海鵬則讚揚羅君左對工作積極投入,一班長輩都疼錫他,盧昨悲傷表示:「唉,啱啱知道。佢好積極工作,好鍾意做《歡樂今宵》,特別係鍾意扮嘢,好崇拜梅艷芳,阿肥(沈殿霞)嗰幾個都好錫佢。」

盧海鵬讚本事

他謂羅君左在後台準備時,貪吃愛吃的性格,人人皆知,尤其對可樂更忍不到口,盧海鵬心痛說:「佢食嘢唔檢點,明知自己有病都唔理,鍾意食就食。以前大家唔知佢有事,到後來見佢皮膚變色,面黑黑咁先知,嗰時都已經係有人捐咗部洗腎機畀佢,佢夜晚就返屋企洗肚。」盧海鵬指羅君左在演藝以外,也嘗試不同範疇,如配音、寫書等,讚他「好有本事」。
本報記者