鱷魚恤（122）唯一一家有NAV折讓嘅成衣股，集團成衣業又持續改善，冇理由大落後，好。鱷魚恤最新NAV每股1.45元，現價0.63元折讓56.6%，而場內近磅成衣股，PB一、兩倍，閒閒哋。又鱷魚恤2010年度純增長14%到1.63億元。雖則純利主要係物業增值收益支持，但集團核心成衣業，就由09年度虧損3180萬元，轉為溢利500萬元，來回講緊近3700萬元。核心業務有改善，折讓冇理由仲相對同業差咁遠。而中港消費繼續好景，加埋新落成觀塘鱷魚恤中心，租客開始入伙，新增租金收益反映，鱷魚恤2011年度業績，仲有睇頭，PE繼續低企單位數。呢轉博鱷魚恤炒落後，係咁意以翻半番計數，集團價見0.95元，仲未有耐上到NAV水位，莫講話要追到上同業PB水位。
亨泰仲係抵買
亨泰（197）2010年度純利幾乎翻一番到2.26億元，集團主打祖國多元化舶來消費品分銷，呢轉食住祖國經濟再起飛及龐大內需潮，嚟緊日子，應該繼續肥仔水。亨泰2011年度純利，只係翻半番到3.4億元，預期PE得12倍，內銷或內需sector，抵搞。呢轉吼實亨泰支持1.25元兜轉，博集團衝穿1年高位，見1.70元，回報率36%，目標價預期PE唔夠15倍，仲係抵買。
錢雋