遊行抬棺材、撒溪錢見得多，但抬病床上街真係絕無僅有。肌健協會星期日（14號）上街，下晝3點由遮打花園行去禮賓府，特別之處在於佢哋帶埋幾張肌肉萎縮症病人瞓嘅病床。遊行搞手張超雄話，今次獲得一間院舍免費借出幾張肌萎病人用嘅病床，到時會由幾位參加遊行嘅病者瞓喺上面示威。
要求政府增加支援
由於遊行要經條大斜路先到達禮賓府，張超雄話唔會推病床上斜，到時病人會坐輪椅繼續遊行，但會搵架車載定一張病床放喺禮賓府門口，勢要畀當奴見到張床為止。
張超雄話今次大約有百幾人參加遊行，搞咁多嘢其實都係想幫一班肌萎病人，因為好多病人一旦病情惡化要做手術插喉，要依靠好多儀器先可以生存，但需要有人24小時照顧，儀器計埋看護都要成萬五蚊一個月，一般家庭負擔唔起。佢哋唔做手術就必死無疑，做完後又因家人無力負擔每月支出而回家無望。所以今次肌健協會呢個遊行，就係要求政府正視問題，畀多啲支援佢哋，等佢哋回家呢條路可以行得易啲。