來自瑞典嘅「聖誕婆婆」Vega，老遠來港參加聖誕婆婆育成班，向八名香港婦女傳授瑞典傳統手藝，培訓佢哋成為首批「港版聖誕婆婆」，等佢哋可以喺今個聖誕以一雙巧手，用愛編織出各式家藝製品、用心焗製秘方聖誕曲奇在港送暖，宣揚聖誕婆婆嘅關愛使命。
「聖誕婆婆」係瑞典傳說，話說佢係聖誕老人背後嘅女人，喺聖誕老人外出派禮物時，佢就努力經營聖誕絕密食譜同編織嘅工作，包括焗製聖誕曲奇餅、編織小飾物及毛冷手工藝等，替每家每戶送暖。
今次同瑞典婆婆crossover嘅香港婦女，係一群基層家庭主婦，佢哋平日憑一雙巧手，以收集被丟棄嘅布碎，設計同重新製成布藝製品出售，賺點外快。