姜文與葛優前晚在北京為新片《讓子彈飛》宣傳，身為男主角之一的周潤發卻未見露面，原來他與友人在赤鱲角機場附近碼頭影黃昏日落。身為攝影發燒友的發哥，前日約友人帶同新歡——港幣7萬多元的Pentax645D最新型號相機拍攝日落美景，享受他的寫意人生。
一向熱愛攝影的周潤發，前日下午偷得浮生半日閒，專程駕駛其audi四驅車到赤鱲角機場附近碼頭影相，同行還有一名男性友人。原來，發哥一心諗住帶朋友影日落，可惜他下午5時半抵達時已太陽差不多下山，叫發哥有點失望說：「自己遲咗，太陽都差唔多落晒。」
為爭取時間，發哥隨即拿出三腳架及攝影器材拍照，又教同行友人攞景影靚相，雖然其友人只拿着儍瓜機影相，但發哥依然落足心機教路，只可惜拍得幾張，太陽已經西沉下山。
數碼機夠環保
在發哥影相期間，記者發現他起用近日新推出的Pentax645D型號相機，售價約港幣7萬2千元，可見發哥為影靚相而不惜一擲千金。對此發哥笑說：「呢部新嘢嚟o架，像素好勁，可以即刻轉黑白，可以喺部機度做晒整相調色，返到屋企之後唔使再喺電腦度執相，攞部電腦睇相已經夠晒靚。家啲相機數碼化之後環保咗，帶一部出街就夠晒，又唔使再嘥時間喺黑房度沖菲林。」
發哥滔滔不絕地向記者介紹其新歡功能，越講越興奮，而發哥這新歡擁有4,000萬像素、一秒連拍1.1張相片，機身側面設有多一個腳架插口，方便拍攝直度相片等等，又難怪發哥愛不釋手。臨走時，發哥還熱情地拉住記者合照，心情甚靚。
缺席新片宣傳
此外，前日發哥留香港影日落之際，他有份主演的新片《讓子彈飛》剛巧在北京舉行宣傳，出席者包括男主角之一的葛優和自導自演的姜文等等。有指《讓》片將於賀歲檔上映，而葛優在活動上更預言《讓》片票房將高達5億元人民幣。
採訪、攝影：黃曉程
