理工大學成立國際顧問委員會，邀請博士F演講，有好多嘉賓準時出席，到香港會吃午餐兼聽有識之士講述珠三角發展，當然係一樂也。博士F學識豐富，周遊列國，備受尊重，可能係香港人之中，最為國際商界認識嘅人物，論國際視野，一時之間搵唔到邊位人士同佢可以比較，幾時聽佢談話，都有得益。
此日與報紙老總C同桌，老總C話本想參加新亞書院校友會之吳哥窟旅行團，點知消息發佈上網之日，即時滿額，佢來遲半步，已經冇份，希望校友會再辦一團。點解吳哥窟旅行團咁有吸引力呀？老總C話：「有何培斌教授隨團講解吖嘛！」唔怪得啦，何教授係中大建築學院院長，對古文化建築藝術甚有研究，在倫敦做博士生時期，花了不知多少時間在不對外開放嘅大英博物館地庫研究敦煌文物與亞洲建築藝術品，由佢帶團去吳哥窟，梗係有號召力啦。校友會近年辦香港及境外文化旅行團，大受歡迎，例如請到丁新豹博士率領香港墳場旅遊團，次次滿額，搞到校友會要訂下規矩，旅行團訂位以新亞校友優先，其他中大書院嘅校友報名，只能做住後補先。
講起校友會，馬主N來電云，佢阿媽嘅中學校友會要辦一百二十周年紀念活動，今日（十一月十三日）下午三點半在FCC（外國記者會）舉行新聞發佈會，由方黃吉雯校友主持。呢間學校就係庇理羅士女子中學，創辦於1890年，係香港第一間官立女子中學，一百二十年來，培養人才無數，老友記公關大姐大就係舊生啦，還有俞宗怡、盧敏儀等等。馬主N話佢嘅姑婆不幸於月前逝世，享年一百○二歲，就係庇理羅士舊生，好彩去世前剛剛接受舊生基金會訪問，留下回憶及圖片，紀錄於「庇理羅士一百二十周年回憶錄」，即將出版，呢本書載有不少舊生嘅舊圖片與活動，馬主N話係香港文化嘅一部份喎。
一間中學能有一百二十年歷史，校譽歷久不衰，人才輩出，係十分難得之事，想像吓十九世紀之時，中國女子無才便是德，三步不出閨門，而居然有女子入讀呢間英文中學，呢批女子以及佢地嘅家長嘅勇氣，實在令人佩服之至！