燒烤樂　負重磅　Wish發揮小宇宙

燒烤樂　負重磅　Wish發揮小宇宙

踏入秋季，BBQ是最佳的聯誼活動，剛遇着豐田新版Wish1.8的長測機會，當然不可錯失發揮7人車極限的機會。大堆食物、碗碟枱椅及單車，結果令人驚嘆，唔止成功發揮負重上山的小宇宙，還力證新偈的超慳油能力。

記者：許維雅
攝影：林栢鈞
Model：Louise、Manis、Jessica、Jenny@Inspire
單車提供：23641666（MiniPit）

大棠郊野公園點去？

選擇大棠郊野公園，全因人少地方大，不過無車都幾難去，車程由新元朗中心出發約15分鐘左右到達。

1.若以新元朗中心停車場作起點，出停車場後沿右入朗日路，再靠右轉入朗樂路。

2.沿朗樂路直駛至燈位，靠左駛入鳳翔路。

3.駛至十字路口轉右入馬棠路。

4.左邊見到大棠指示左轉入大棠路。

5.靠左駛入僑興路，然後左轉入大棠山路上山便到。

■沿大棠山路再上些少，右邊有停車場入口。

■兩個停車場合共約有30幾個免費私家車位。

■泊完車可沿右邊小路行返落燒烤場。

容量驚人　負重NoProblem

以家庭車而言，向來幾鍾意豐田Wish細細架易操控，坐得七個人，充滿跑味的流線型車身，唔會令人感覺笨重，最重要是廿多萬元的車價夠晒抵玩。最新版本Wish1.8到港後都未有機會慢慢細嚐，趁紀曉華Walter拉大隊去元朗大棠郊野公園BBQ，一於班齊馬試車又試菜。
連同四個女仔、兩個記者及兩個攝影師共九個人，當然一架Wish已超載，不過我負責揸住Wish載四個女仔，再摺合最後排座椅擺放大堆燒烤用品，慌死車尾仲有位剩，仲多放一張摺合餐枱及一架單車，感覺居然鬆動唔逼仄。唔好以為佢車身扁扁，尾箱容量原來可以如此驚人，當日負重唔輕的Wish，行經有不少暗斜的大棠山路上山時，更表現出力量十足的一面。千祈唔好睇小佢只得144匹馬力，換上VALVEMATIC引擎的新一代，無論力量輸出還是起步反應，都比上一代爽快得多，絕對唔使踩到地板加油上山咁羞家。

■全新牙仔設計的鬼面罩跟一般七人車設計與別不同。

■尾燈設計較平實，改用靚仔又慳電的LED燈會更佳。

■白光燈新增自動調校角度功能，摸黑落山都唔怕。

親試油耗　毋須$1/km

想增加操控玩味，我有時會啟動Sport模式來爬頭過車，再玩埋軚環上的加減波撥片，有暢順的CVT波箱及安全的循迹控制系統配合，完全感受到飆車入彎的樂趣。
新引擎的另一賣點是油耗更低，廠方所提供的油耗數據是16.2km/L，即每公里約$0.86，雖然一般人認為廠方提供的數字偏低，但親身試過入滿油後來回元朗一轉，再返公司將軍澳，然後夜晚落柴灣影相，支油針都無乜點郁過。經過數日長測，都幾肯定油耗毋須$1/km，即使去幾遠郊遊BBQ都唔會肉赤。

■七座位並非虛有其表，中後排座了四個人唔逼仄。

■一張餐台及一大堆雜物都擠唔滿尾箱，最後放埋部單車都仲有位剩。MiniCooperBike$5,200

■豪華版多天窗、免匙及後泊鏡頭等，貴二萬多元的車價算合理。

■中控台一貫實而不華，簡約實用。

■入油後行了80幾公里，支油針都未郁過。

晚出巡閃到爆

呢幾日換來最多朋友讚嘆的，就是白色車身跟Wish的動感外形非常匹配，還有會自動調校光線角度的高亮度放射性頭燈，於夜晚四出遊街時光得驚人，大部份人的評語都認為它配備升級，但車價卻保持廿幾萬元，實在是七人車抵玩之選。

Wish1.8規格

引擎：1,798cc直四16雙頂VALVEMATIC
馬力：144PS/6,400rpm
扭力：176Nm/4,400rpm
傳動：七前速自動波連+/-
售價：$245,823（豪華版）
查詢：23054555（皇冠車行）