亞視搞嘅《2010亞洲小姐競選》決賽下月5號舉行，候選佳麗噚日見傳媒。雖然早排掟走咗臭口芭比，但個選美似乎依然唔太順利，19位佳麗噚日只有16位現身，大會話11號權蕙洙腳傷、16號何婭萌抱病，越南佳麗12號麥莎莉早前食物敏感搞到全身抽筋，緊急送院後決定退選。
硬銷5D裸肌
亞視高層葉家寶話麥莎莉嘅空缺唔會再搵佳麗補上，佢又硬銷今屆比賽會以「5D裸肌」角度畀觀眾睇，包保睇到大家血脈沸騰，但乜嘢係「5D裸肌」？佢淨係解釋話勁過3D囉！
噚日見到泰國佳麗9號邱淑芬塊面生晒暗瘡，隔條馬路都睇到，佢話之前食咗暗瘡藥，唔知係咪藥物敏感搞到爛面，但已換咗新藥。
無綫唔嬲鵬哥
將做表演嘉賓嘅關楚耀話，最吸引佢視線嘅係6呎1吋高嘅韃靼斯坦佳麗8號維他．芝寶絲娃。維他同關楚耀合照時話，關楚耀代表中國人絕對係靚仔，但如果代表外國人係咪太矮？維他話大家心照喎！
講到盧海鵬勁踩無綫，關楚耀話要搵鵬哥合作rap歌，仲話預咗放棄無綫呢個平台。無綫外事部副總監曾醒明就話，喺公開場合謾罵唔恰當，但就唔會嬲鵬哥。
另外，前晚亞視節目巡禮仲有個亞姐泳衣環節，啲佳麗着晒三點式上台，佢哋都話唔介意呢個場合咁着。而唔少佳麗上圍好有睇頭，最震撼係有36吋上圍嘅7號娜塔妮亞．卡娜絲娃。