疑似下屆特首候選人梁振英（CY）噚日為中大領袖系列講座演講，雖然一開口已經此地無銀咁話「今日唔係發表政綱」，但唔少人聽完講座，都話內容同政綱冇分別，當中包括身兼講座主持人嘅中大學者蔡子強。
CY演講內容猶如一份應徵特首嘅履歷，大談自己過去喺特區籌委會如何向中央獻計，令中央落實唔少至今對香港整體社會都有深遠影響嘅政策，包括對駐港解放軍施以封閉式管理；唔准內地人來港做女傭等，其間當然不忘出招暗寸死敵唐唐。
自稱經常搭電車地鐵
標榜關心基層嘅CY話，擔任政治職務係要為人民謀福祉，「唔係為自己留名後世，更唔係為咗光宗耀祖」。唔少人聽到，即時諗起唐唐家臣林大輝早排講過，唐唐搞關愛基金，「可以光宗耀祖，又可以一敗塗地」呢番說話，認為CY矛頭指向邊個昭然若揭。
CY跟住再嚟招馬後炮領功，話自己經常搭電車、搭地鐵，中午又去快餐店買飯盒，仲話「三年前當我開始提貧窮問題時，社會上有話事權嘅人，好多唔信貧窮問題嘅普遍性，更有人認為唔需要有最低工資」，以示自己有先見之明。
難得台下有位女大學生心水清，即時喺發問環節質問：「我想問吓梁生，從2007年11月起，你開始發表關注基層嘅言論，唔知背後有乜原因？」問題一出，唔少幾乎悶到瞓着嘅學生都即時笑醒兼拍爛手掌。難得CY臉不紅耳不熱咁答：「原因好簡單，因為香港貧窮問題越來越嚴重。」結果換來學生另一陣笑聲。
臨尾不忘擦煲呔老董鞋
令唔少學生聽到好礙耳嘅，仲包括近年為攞分不時插政府嘅CY，噚日竟大讚煲呔「係一個完全稱職嘅特首、一個負責任嘅特首」；臨尾仲要加句「我唔係個隨便肯定一個人嘅人，亦唔係一個隨便去擦鞋嘅人」，佢再讚埋老董都係稱職特首至肯走。
CY做唔做得成特首家冇人知，不過接待過唔少疑似下屆特首候選人嘅蔡子強，就品評佢哋嚟中大演說嘅回答技巧，當中唐唐係一句起兩句止，多一句都冇；律政司長黃仁龍好似傳教咁，講話有說服力。CY呢？滔滔不絕帶你遊花園囉！
mailto:[email protected]