"中利記冷W後不回頭"
上次撐戰友小登科場，重心命中佢愛隊利記扑低車仔，其實賭波那有義氣可言，輸咗搵邊個賠番俾你；講到底，最重要仍是值博率，個3.6倍主W打到落3.1倍，原來車仔公佈陣容冇最勁嗰兩位杜奧巴同艾辛。
早買睇賠率者不用顧慮太多，但係忍到最後睇陣先落注，好似睇股票業績對辦先落叠咁，分少啲但安心啲。不過場波，利記戰意如虹，但贏來說服力未見太多，學牽牛兄話齋，連盧卡斯都打到咁生，因為對手冇艾辛喺度咋；結果周中紅軍對韋根作客熱透，跟風者即中伏。反而阿仙奴竟敗給紐記，我認為紐記發揮得異常出色，抵輸。
到周中，擂台重心重注阿仙奴，只因稍為換回賠率作客級數極低嘅狼隊，只是有運贏兩粒開到[-1]；到明天作客愛華頓又要讓，唔敢喺度推介咯。至於紐記，耗盡全力後，周中返主場竟負布力般。
"老樸見底要低吸"
唔穩陣嘅捧場對象，結合賠率轉熱，唔好回頭，今年大旺零售股，連一啲你我都唔會幫襯嘅金飾同服裝股，都升到嘭嘭聲，有時真係唔好用太自我優越嘅心態去諗水頭充足嘅祖國同胞，個投資組合冇佢哋，今年好蝕章；趁呢期回調20巴仙以上，有錢買番啲等聖誕前再升過。老樸跌落英冠，股權易手後似見底準備回升，隊波不乏超英冠質素嘅球員，周中平手推介博佢哋打低「1哥」昆士柏，結果最後1分鐘被迫和；今次主場對唐加士打，英國波今期開快車，老樸連續兩場主場好着數，稍熱2倍W我認為可以再追。
"曼城悶波？今次殺伯俾你睇"
周中英超打補賽，我哋咁爛癮，天氣又唔凍，一次半次都要捱到凌晨6點，好彩唔係獨播悶爆0:0嘅曼市打吡，如果唔係真係早就攤喺梳化瞓到不醒人事。阿仙奴同曼市打吡兩邊睇，悶波唔係冇得着，曼城今季有啲黃國英先生常說的「蠱惑的槍」feel，究意係文帥保守定係將帥不和，定係油佬老細嘅柯打，唔易估。不過曼城俾費Sir串好悶，今日再主場出擊，對升班第2季最危嘅伯明翰，曼城憑雄厚陣容，應該變主攻博大數一場，艾迪巴約上場踢1分鐘，hea完今日有得出入幾粒？
"鯨魚今次嚟真必捕鼠"
鯨魚上周榜首大戰1球小負鹿角，令到日聯冠軍之爭仲未正式玩完，其實成場波前者踢來誠意唔高，想博1分但又畀射手馬昆奴斯攻破；去到成70多鐘先施施然換入鬥莉王同貝辛奴域兩位主力盡吓人事。
踢波賭波有時都要識稍留識輸，千祈唔好贏粒糖輸間廠，注碼太多必減弱重心選擇嘅威力。但明天鯨魚主場迎戰周中打過補賽、用咗力嘅大宮松鼠，係時候還我班霸本色。最重要開波前見鬥莉王復任正選，若同日早場前鋒惡鬥鹿角兩敗俱傷，隨時贏波賽後剩番4場有10分優勢。同阿仙奴一樣，博反底要有勇氣，鯨魚[-1]2.3倍也不能輕手。
語錄：長追都要睇對象睇值博率，信唔過嘅，受過教訓，應該識回頭；否則，輸一兩次當睇真隊波，好平常啫。
文：蘋果波神