早前有大學男生向女高官訴苦「無樓女友唔肯嫁」，引嚟網民喪鬧港女貪錢，鍾意層樓而唔係鍾意個人，有份參與《補貼屋》製作嘅Sylvia反駁呢啲指控，話對女仔好唔公平：「女性當然係想男性有能力，可以照顧到自己，唔覺得有問題。」
Sylvia係浸大視覺藝術副學士二年級生，跟Oliver學填詞而成為「窮飛龍」成員。《補貼屋》歌詞「窮盡我副身家，連兼職都殺，太貴買不下」，八方覺得勁到肉，Sylvia都話好有共鳴，「我身邊好多同學都覺得，將來畢業搵到工都供唔起樓，所以好多人都打算申請公屋」。
八方問佢，將來會唔會肯同男朋友夾份供樓先？Sylvia就話如果男友買樓有壓力，佢都願意出一分力，但佢亦都好老實咁話，最好男友自己有樓，解決到住屋問題。