最低工資定為28蚊，擔心嘅人似乎多過開心嘅人。讀書時都有聽過，勉強定立最低工資標準，只會衍生「黑工」問題。
理由好簡單，有老闆唔肯出28蚊一個鐘請低技術工人，有「量地官」唔介意收少啲，最緊要有工做，喺你情我願嘅情況下，就會出現唔跟法例嘅僱傭關係。不過，最擔心係老闆怕犯法，但又負擔唔起上升嘅薪金開支，最後裁員。
增值求存 適時執生
朋友問敏妮點樣可以保住飯碗？勤力、上進、有耐性……全部都需要，但唔係必要。敏妮對上有老闆、上司，對下亦有一班同事幫手，打工咁耐夾喺中間嘅時間都唔少，大概掌握職場生存之道，touchwood講句，暫時遇到嘅上司都係挽留敏妮，而冇要炒咗敏妮嘅！
首先對上，你先要知自己喺上司眼中有乜價值，如果你嘅優點係非常勤力，之外暫時發掘唔到其他較突出嘅，你嘅價值就等同一頭牛，咁新界都唔少。衡量市場供求關係，你嘅價值極低，被淘汰機會極高。想生存，惟有增值。
可以點樣增值？或者敏妮呢位同事可以係一個唔錯嘅例子。話說呢位同事好怕麻煩，亦好安於既定嘅工作模式，喺敏妮眼中，呢類同事攞唔到好嘅高印象分。
不過，佢有一樣令敏妮好讚賞嘅工作方式，就係每次遇到新問題，當敏妮解決完後，第二次再遇到類似嘅情況，敏妮都唔使費神，因為佢會仿照敏妮之前嘅做法，再「自動波」按情況modify，處理咗件事後，先至同敏妮講。
講到尾，老闆同上司都係想班下屬員工分擔自己嘅工作，而可以做到呢一樣，就係為自己增值加分。當兩個只能活一個時，保住飯碗就係靠一點一滴累積番嚟嘅好印象。
溫敏妮
http://wanmanli.com/blogs/