樓價升不停，打工仔狂呻上唔到車，大學生又話女友冇樓唔肯嫁，人人叫苦連天，除咗上網睇電視劇《創世紀》許文彪狂鬧：「呢個世界公平咩！」八方最近發現有更好選擇，有網民將《囍帖街》改填新詞變成《補貼屋》，唱到熱爆網！好似呢幾句「踏上普通區，隨口開天價，每呎也一萬，但女友，無樓不出嫁，怕永沒法高攀。」真係聽到房奴、準房奴同「恨」做房奴者個個眼淚在心裏流。
填詞嘅Oliver陳歷恆都係高樓價受害者，難怪歌詞句句到肉。Oliver十多年前喺加拿大讀大學，畢業後回流，初時兼職填詞作曲，後來做專業音樂製作人，作品包括Twins《老鼠愛大米》廣東話版本歌詞，以及羽翹《無花果》，亦有開填詞班。
搞音樂搵唔到錢 女友分手
做娛樂圈表面風光，Oliver坦言搞音樂搵唔到錢，最近女朋友都走埋，「我同佢拍拖三年，佢覺得我買唔起樓難倚靠，最近同另一個有樓嘅男士拍拖一年就話結婚。」男人買唔起樓有苦自己知：「如果有兩個男人擺喺女人面前，一個冇樓，一個有樓，你覺得佢會點揀？」
八方俾佢質問，冇嘢好講。Oliver最近睇新聞，見到大學生話女友冇樓唔肯嫁，刺激佢寫成《補貼屋》，「原作《囍帖街》填得好好，內容較中產同有深度，我寫《補貼屋》則要直接，因為網民冇耐性，要聽第一句就知你想講乜。」
Oliver話家網上改歌，有啲似「歌神」許冠傑風格，「阿Sam嘅《加價熱潮》同《半斤八両》，歌詞都係好市井，容易引起大眾共鳴」。
Oliver改歌仲會搵埋一班學生同80後畀意見，所以有唔少網上潮語，令網民更有共鳴，佢哋合力創作嘅作品包括由《陀飛輪》改成嘅《窮飛龍》，同埋將《直到你不找我》改成《直到你刮到我》等等，相信唔少網民都聽過。最近佢哋索性以《窮飛龍》為名，因為飛龍代表香港，而部份香港人又確係好窮喎。
補貼屋（原曲：囍帖街）
窮盡我副身家連兼職都殺太貴買不下
地價貴還奢想補貼借貸就靠brother
租公屋成畢生志願好過露宿吧
期望特首幫拖安居置業救市有否嗎
踏上普通區隨口開天價每呎也一萬
但女友無樓不出嫁怕永沒法高攀
居屋怎會再沒存在「安心」總不可靠麻煩
有首期亦要供餐死怕嗎是發水樓重擔
（窮盡我副身家）都供不起驚一世也沒法娶她
即使先租買後沒煩薄薪水節食下捱殘仍沒能力買下
（忘掉設置的家）好想傢俬擺設艷麗富麗豪華
於香港打工一語中的只有貧窮嗎
一生吃「大家樂」是嗎
情似破碎的沙 無樓不出嫁 女友每天罵
沒法買豪不起蝸居 老要住護老之家
香港表處似是華麗翻開深處洗淨鉛華
有薪酬但比不起通脹高望「置安心」有用嗎
（窮盡我副身家）都供不起驚一世也是個輸家
多張沙紙再向上爬但商富壟斷下平民全沒能力買下
（忘掉設置的家）不怎貪心沒要極大富麗豪華
偏偏於這香港地買樓天價如何買 周街也流浪漢是嗎
怎挽着私樓這鎖匙一下
註：聽歌可上網 http://www.youtube.com/watch?v=yTfemIfgeBc
mailto:[email protected]