Move出狠招　肉彈打黑拳

打爆電視歷史時刻又到喇！今次係PS3Move帶大家打黑拳，舊體感橫、直、勾拳只係小朋友打交，《TheFight：LightsOut》話畀大家知，玩埋舂頭批踭、過肩摔都仲得！呢期公私諸事不順？上網睇埋《肉彈》試片，幫你上堂發洩、出氣深造班！

記者：許福合
攝影：陳盛臣
Model：Betrys@GME

喪賭黑拳

仲記得《TheFight：LightsOut》早前在東京遊戲展展出時，有個好正嘅日本名──《肉彈》，不過正式來到香港，就無採用，只係用番英文正名，感覺有啲失望，哈！
當然，用咩名唔會影響到遊戲性，《TheFight》係一款Move體感遊戲，想享受拳拳到肉嘅快感，用家就要預備Move喇！講真，呢隻Game幾易學、又易上手，因為基本上識得用拳頭舂人嘅都會識玩，只要左右手各揸一支Move控制器，就可以揮動拳頭打對手。而遊戲中嘅玩家，會係一個打黑巿拳嘅拳手，每局開始前都可以落注賭錢，有咗錢又可以買更好嘅訓練道具，再去挑戰難度更高嘅對手。

■雖然係打黑拳，但有唔少場景可以揀。

■開賽前，可以先看對手資料同獎金。

■可以落注賭一手，仲有賠率，2.4倍大冷喎！

■雖然打到爆晒血，但做低對手就有機會學新招。

茅招惡搞

《TheFight》易學，但絕對難精！初期嘅對手，唔使多研究，幾招花拳繡腿都有機會打贏。但對手會越來越強，而且仲會出茅招，變成摔角一樣，無乜規則限制。而玩家只要打贏幾個對手，就有機會深造，可以學習絕招。
最基本拳法，直拳同勾拳，就只需要揸住手掣打出，試玩時就學到鎚擊同批踭，出招時按住Move按鍵，鎚擊會舂對手個頭，而批踭就專打人心口，應係幾常用嘅茅招！除咗打之外，仲可以閃避，只要將兩個Move手掣拍埋，左右擺動就會做出閃躲。之後仲有機會學到過肩摔，鎖頸等強招，仲唔係變成摔角？