四叔個仔「四仔」無厘頭爆單串燒三兄弟出嚟，點知發完相畀傳媒唔夠24小時，單嘢就由弄璋之喜突然變成涉嫌犯法，真係峯迴路轉。咁單嘢家突然間去到法律嘅層面，仲要關晒成個香港事，有賓卡老友就同華華講，「四仔」呢劑好明顯係失策，事關之前都有人咁做，但係就高章好多，至少到家都無俾人將軍吖！
老友話，佢哋有個前行家，家係某私募嘅揸Fit人，好似「四仔」咁，幾廿歲人都無正正經經公開過咩女朋友、紅顏知己，但係突然之間就話做咗老竇，仲要係龍鳳胎，咁媽咪係乜水？佢就點都唔講。
搵洋妞代生龍鳳胎
賓卡界話晒都係富貴一族，啲天地線搭通成個地球嘅上流社會，好快已經有人八到，呢個私募猛人原來係搵代母幫佢繁殖下一代，由於純屬佢自己想要兩個親生骨肉，唔係為咗咩分身家，所以BB性別佢揀咗一男一女。基於唔想多是非，所以佢揀咗一個洋妞接呢個Job，而繁殖工程就喺花旗國進行，兩件製成品亦已經運咗返香港好耐嘞，聽聞稍後仲會運返呢位私募猛人喺內地嘅祖家。
老友仲話，唔係好明「四仔」同佢阿爸，點解要將單家事咁樣揚出嚟，假如「四仔」話，係呀，串燒三兄弟係有阿媽生o架，只係我同佢意見不合，所以啲仔跟我，咁又唔犯法，啲仔又開心，至少大個咗之後，唔會俾人指手劃腳吖！
李華華
mailto:[email protected]