日圓高企，八方同好多人一樣，今年都未必捨得去東瀛度假。特首煲呔就唔同，用公帑去東京唔肉赤，此行主要係出席亞太經合組織會議，前菜就係參觀當地廢物焚化設施，煲呔考察多摩川清掃工場。
呢個高科技焚化爐好犀利，每日可以處理300噸垃圾，採用先進技術，對環境影響好細，雖然位處市區，不過並無厭惡性感覺，工場入面好乾淨整潔，而燒垃圾時產生嘅熱能，可以轉化做電力，為工場附屬嘅公共設施，包括泳池等提供足夠電力做暖水池，附近居民都可以享受廢物利用嘅好處。
原來煲呔都係哈日族，大讚呢個焚化爐處理廢物效能、污染管制設施同環保設施，竟然可以做到無煙、無臭、無聲，值得香港借鏡。