人行前日突然公佈調高銀行存款準備金率以抽緊銀根，目的好清晰，就係壓抑通脹，噚日公佈嘅CPI上升4.4%，較預期高，加埋要防範QE2嘅資金流入，調高準備金率亦有防範嘅味道。
抽緊銀根消息嚟得突然，但係就冇影響噚日嘅港股，恒指連跌兩日之後，大幅反彈199點，報收24700，成交增加至1227億，都幾有力，港股今朝早好大機會再推高。
工行C輪24209：工商銀行（1398）噚日報收6.82元，升2.8%。股價喺禮拜一升上6.90元之後掉頭回試10日線，噚日回復升勢仲補埋裂口，加埋大行睇好推介，應該會借勢破7元關推向7.40元，可以諗吓隻C輪24209。
隻輪現價39.5仙，2011年2月21日到期，行使價7元，溢價8.4%，引伸波幅32.6%，槓桿率17.3倍（有效8.2倍），正股升上7.40元，24209睇72.6仙，升幅超過8成，正股跌穿6.62元就沽咗隻輪計數。
俊樺