全面復出影壇嘅張栢芝片約一部接一部，早前忙於拍攝《最強囍事》，之後即飛到上海客串馬楚成新戲《極速天使》，日內又要為《楊門女將》開工，認真忙到氣咳，不過栢芝一向着重家庭，家要佢離開乖仔咁長時間，佢梗係唔捨得，所以佢之前就帶埋大仔謝振軒（Lucas）陪佢拍戲，日前仲趁得閒帶Lucas去上海星期8小鎮嘅兒童主題公園玩一餐。
Lucas嘗職場人生
本周一栢芝同Lucas等一行幾人去到星期8小鎮，由於公園嘅主題係畀小朋友體驗兒童版嘅職場人生，見到Lucas玩得超開心，除咗揸住支槍化身做型仔解款員外，佢喺參觀縮水版醫院時又興致勃勃睇顯微鏡，Lucas全程都玩得好投入。
傳母子天價拍戲
栢芝雖然拍戲都拍到好攰，但佢都好有耐性全程陪住囝囝，佢仲好友善咁同記者話：「今天超開心，雖然工作令我感到疲憊，但能和兒子一起，享受他喜歡的生活，一天睡不到三小時，我都感到很幸福。」
好多人都覺得Lucas受歡迎程度直逼爹哋媽咪，吸引唔少人都想爭住要佢同栢芝母子檔演出，雖然佢哋之前幫過周星馳嘅《長江7號愛地球》合唱主題曲，不過Lucas嘅螢幕處男作就有好多人想搶頭啖湯，噚日內地傳出峨影集團今年8月以天價力邀栢芝母子檔演出喜劇《無價之寶》，集團董事長何世平仲直認有呢件事，又話天價唔算貴㖭！據知栢芝母子喺片中會遇到黑手黨追殺，係一個集搞笑同探險嘅古仔。