李嘉欣自懷有「亨」種後依然密密搵錢，昨日她腳踏3吋高踭鞋到銅鑼灣出席珠寶店活動，即場宣佈懷有許家慈姑椗。對於有傳她體外養卵，她未有正面回應，更指曾向亨亨提議找代母，不過老公大冧她是世上唯一，只會和她生BB而作罷。
李嘉欣自懷有許家血脈，依然工作不斷，昨日現身銅鑼灣，為珠寶品牌Mikimoto任剪綵嘉賓，身穿黃色連身裙的她腹部隆起，上圍豐滿了不少，更有少少離罩，腳踏3吋高踭鞋，不過祝酒時未有飲香檳。
老爺奶奶開心
嘉欣表示重了十多磅，更透露腹中BB是仔，記者問她懷有許家慈姑椗，老爺奶奶會否很開心，她說：「冇研究過佢哋係生仔定女開心啲，淨係知佢哋好開心，唔需要特別獎勵，因為係自己骨肉，自己本來想生女。」
問到會否再追多一個女時，嘉欣笑說：「完成呢個工程先講。」對於早前有傳她是以體外養卵受孕，嘉欣未有正面回應：「由第一日開始，都冇統計過上幾多封面，最過份係咒我BB有唐氏綜合症，我一啲反應都冇，一啲唔開心都冇，因為我享受呢個時刻。」
曾要求搵代母
再問造B是否100%天然，嘉欣表示暫時不考慮人工方法，她說：「我之前同老公講搵代母生，都係我哋兩個結晶品，佢同我講有冇小朋友唔重要，全世界只同一個人生，嗰個就係我，我好感激佢，真係唔該晒，係佢整蠱我，咁好帶挈。」問到BB何時出世，是虎定兔BB，她說：「我身邊太多虎，想要兔。」
此外，有傳嘉欣想拍陀B裸照寫真，惹來奶奶不滿，她說：「有呢個想法，冇諗過公開，我做每一樣嘢，家人都好支持，根本冇爭議。」採訪：R.AuYeung
攝影：ChanChiLam