曹仁超同香樹輝噚日喺香港經濟峯會聚首一堂，兩個名嘴坐埋一齊，傾啲咩？竟然唔係香港經濟或者股市走勢，而係曹Sir嘅普通話！
被香樹輝喻為港股第一號投資者嘅曹仁超，普通話程度普普通通大家都知，但係估唔到，香生一見曹Sir就大讚佢普通話好咗，香生話喺Youtube睇到曹Sir講普通話，比起舊年好好多。佢仲喺高峯論壇上提議：「曹仁超講普通話，李小加講廣東話。」
曹Sir無即時回應，亦無即時「表演」講普通話，但係港交所（388）行政總裁李小加上台時，即刻話其實曹Sir講嘅普通話，佢已經比以前聽得到多咗。究竟曹Sir嘅普通話係咪好咗，並唔係華華最期待知道嘅嘢，華華最期待嘅，其實係曹Sir同李小加喺論壇上「母語互換」嘅一幕！
李華華