多年前去過香港的美食節，逼人不在講，所謂「美食」只是各大食品公司的陳年貨尾，仲聲稱益街坊賤價一折出售，自此對「尾食折」敬而遠之。望過大海對岸，人家的美食節名副其實，不知不覺已來到第十屆，依然越搞越大越有睇頭！
記者：曾冠輝
攝影：黃子偉
模特兒：ParisChan@PureModels
日
少林下山撐河南小食
上周五，細雨帶風濕透馬交的街道，「澳門美食節」於旅遊塔下的西灣湖廣場，如常開幕。話晒嚟到第十屆，規模固然有增無減。除了慣常列席近百家澳門地道食肆，中式、亞洲、歐陸、風味、甜品等區域之外，今年還增設了兩條主題小食街，請來河南及馬來西亞兩地共30多家大舖小店遠道而來擺陣迎賓。站在左河南右馬拉的兩個大門前，我首先被木無表情守在「街口」的少林僧人吸引住。
若然事前你問我：河南有咩小食出名？我應該即時囧樣。就係因為咁，河南美食街即時神秘又美麗。穿過偽裝的牌樓，面前兩排檔口內每個「店小二」清一色穿上同款古裝，放眼各家不是老字號，就是當地薄有名氣的。其中的老侯家，派出兩位店小二舞鞭一般將搓好的麪粉拉吓彈吓又fing吓，fing出河南地道的燴麪，偏平而粗幼不規則，泡上濃濃羊肉湯正合秋冬滋補用；過隔籬，站台也是位大叔，是百年餃子店京都老蔡記的第三代傳人。為了把最地道的招牌餃子帶來澳門，專誠從鄭州帶了馬尾松鋪在蒸籠底，散發出獨有松香。餃子皮極薄，夾起卻又帶韌不易散。餡料多，豬肉配上清爽馬蹄，既有肉味又減油膩，不枉為清朝宮廷御膳之一。
「咦？咁少林武僧呢？」當然唔會有「少林廚神」或「易筋經包子」。美食節除了食都仲有表演睇的，不單止純歌舞，還有雜技、民族舞蹈。河南嘛，當然派出少林武術上台，滿心期待鐵頭功與金剛腿……武術表演唔係晚晚都有，撞唔撞啱就睇施主造化。
馬拉香花煮叻沙
去年美食節，已請來檳城的美食單位，今年乾脆一併請來20間食肆助陣。馬拉街前是一座馬來西亞傳統房屋模樣的三角形牌樓，未進內已嗅到陣陣藥材氣味，是肉骨茶呀！多久沒有到訪馬拉，懷念一碗熱騰騰的濃香肉骨茶做早餐，40年歷史的盛發帶來一大鍋最地道的，正好讓我搔一搔癢；這時對面舖竭力在平底鑊上炒着粿條，醬油肉絲炒來香氣毫不輸蝕，入夜後更冒出整日惟一驚見的人龍；入啲，仲有一檔叻沙兼賣蝦麪的，豬牛雞鴨魚蝦蟹喺澳門都可搵到，惟獨一種香料「香花」只馬拉獨有，檔主隨團帶來，切碎灑上叻沙湯面，立即增加一份清香，是任你在香港馬交都無法找到的味道……其實所謂馬拉街，就像是把當地的夜市或熟食中心整個搬來馬交！
全場最抵！$25法國鵝肝
除了兩條過江龍，澳門本地亦有中堅和新血。攝影師離遠已認出：「嘩！水佬榮呀！我鍾意！」檔面沒有招牌花甲蟹煲，而是堆滿一隻隻蒸得橙紅的大閘蟹，齋睇都已夠開心，可惜連日來幾餐蟹局，蟹膏尚未化做營養，不如要個椰青消消滯。不料檔主掏出一個真係青BB兼未批皮，原隻大大個的椰青不特止，仲拎埋電鑽開窿，可謂大陣仗，齋睇呢下都值回票價，不過拎住咁大隻椰青邊行邊飲真係幾攰。又有一檔是一班年輕男女主理，力叫：「25蚊一件法國鵝肝……」嘩！抵！好醜都要試啦，一塊法國鵝肝size都有3×3cm，簡單配一片多士入口滿口油香，只略嫌煎得過火了少許。店家喜好是澳門新開食店，主打西餐甜點，以為是柴娃娃幾個後生開舖創業，原來還有前酒店廚助陣。又難怪能創出另一道以蕉皮作碗的焦糖布甸，滿載香蕉氣息之餘亦吃得過癮。
店花Top3！
日頭在場內繞了一圈，好些店因為香味、因為gimmick、因為個人喜好，亦有一些為了「表面風光」而靠近，包括店裏給你遞上食物的那個。望住靚女，點都食得開心啲。
夜
檔主NaturalHigh! F1有得試玩
入夜後，雨仍在下，大概因為周五收工，會場漸漸人多熱鬧起來。美食節期間，大會邀得來自馬來西亞及河南的表演隊到來，每晚輪流表演雜技、舞蹈、武術等節目，同場還設啤酒競飲大賽，打造成嘉年華般的氣氛。開幕當晚就見馬來西亞一支表演隊，在一隅空地豎起大旗，旗可不小，足有五六個漢子咁高。只見領頭的用腳輕輕一踢，旗杆便頂在後方隊員頭上，看得人目瞪口呆嘩嘩嘩的……
台下檔主也有naturalhigh的。遠遠聽到嘭嘭聲LadyGaga，見三個麻甩佬un身un勢fing手又fing頭，唔型，不過極之好玩：「我哋已經第8年參加美食節，今年係佢哋請我哋嚟，因為我哋係全場最識搞氣氛！」澳門咖啡檔主是葡國人，操半鹹淡廣東話，不時叫路過遊客一齊跳，仲會撩吓女仔：「靚女，我請你食件餅，唔使錢！」講講吓，突然走到雪櫃斟咗杯Vodka請我飲，當然奉陪啦！我懷疑夜少少檔口對開空地會變成舞池。另一邊廂，突然又冒出一條人龍，攤檔內放着一台遊戲機，美食節連機都有得打？之唔係順道踩場宣傳澳門一年一度格蘭披治大賽車，完全模擬比賽賽道，玩完，你就知揸Formula1真係唔易！
第十屆澳門美食節
地點：澳門西灣湖廣場
日期：即日至21/11
時間：周一至四5pm-11pm，周五至日3pm-12mn
備註：13/11及21/11，9pm還有煙花睇。
＊文中價錢為澳門幣
WEEKEND好旅程
澳門
明日多雲，19-22℃
