亞視昨晚在大埔總台舉行節目巡禮，除讓候選亞姐性感示人及穿泳衣搶鏡外，還由盧海鵬演短劇謾罵無綫，並唱出舞台劇中歌曲《無綫你鬧咗未？》，歌詞內容有「乞我憎」等甚激字眼，盧海鵬事後表示：「撈完唔使撈啦。」但又謂說的都是事實，也沒想過要回無綫。
亞視昨晚舉行《2011年節目巡禮》，全台藝員及候選亞姐都有出席，其間台灣歌手小胖獻唱，盧海鵬演趣劇。亞視宣佈明年開拍鄧特希監製的60集青春劇《親密損友》，由關楚耀及趙碩之主演，其餘均為綜藝節目。
預咗返唔到TVB
亞視安排亞姐以晚裝及泳衣亮相，澳洲的7號娜塔妮卡娜絲娃有36.25吋上圍，15號劉曉智及16號何婭萌的晚裝也頗性感，但也不及盧海鵬的短劇搶鏡，他將舞台劇《東宮西宮》中的歌曲《無綫你鬧咗未？》整首唱出，內容主要謾罵無綫，言詞甚激。
鵬哥上台即問台下人：「無綫你鬧咗未？」然後唱歌：「無綫很乞我憎……成日要歌星個個畀面，唔係冇獎分。」還有「成日學人抄製作可悲，求求其其質素冇得比……」最後則是「萬千星輝咁又點，愚弄你……」
問鵬哥為何要罵無綫？他說：「呢啲係我對TVB真情剖白，愛之深，責之切，無綫曾經係我好知己。」說完即扮跌倒。事後鵬哥受訪，他說本來他扮幫無綫的觀眾，他謂：「唔知點解叫我做呢個，撈完唔使撈啦。人哋個劇係咁寫，唔係我做o架。」問他可有拒絕演出？鵬哥說：「反乜抗呀？冇所謂啦，況且都係事實，咪講出嚟俾人知囉。」沒有想過返無綫嗎？鵬哥說：「冇諗過去邊喎，我都幾十歲人，叫我返去拍劇都唔拍啦。」
王征聲言Cut廣告
對於鵬哥喪插無綫，亞視製作高級副總裁葉家寶說：「純粹搞笑啫，成段喺舞台劇演過嘅。」問他怕不怕無綫提告？葉謂：「都未知點播，播嘅時候會按廣管局條例標準，做好研究工作。」
而現掌亞視大權的王征上台接受亞姐提問時說：「我哋要cut一半廣告，向發水電視台開戰。」王又指不想電視台廣告太多，並謂入主後新聞部不會自我河蟹。
採訪：王崇穎
攝影：陳俊強