施華洛世奇上身　Sharp閃爆

你走入港鐵車卡，眼見八、九成人都用緊iPhone4嘅時候，咁仲算唔算係「潮流」先？反而用作襯衫嘅飾物手機，隨時叫你眼前一亮！機場新返SharpSH5018C，罕見直身設計已令人眼凸，再加上圍邊鑲滿施華洛世奇水晶，只要有大光燈嘅地方，你都閃爆！

記者：陳國輝
攝影：林栢鈞
Model：YoYo@Zmodel

水晶手機繩大大粒

平日所見，o架仔機唔係純色調加滑蓋設計，就係摺機搭旋轉屏幕，做乜Sharp今次會嚟個反傳統？當你開機嗰一剎那，就會明白！SH5018C其實由內地返貨，亦即是中國行貨，日本並無推出過；為迎合內地用家要求，當然越閃越好，所以圍住機身四邊，都鑲滿細細粒嘅施華洛世奇水晶；更令女人羨慕嘅係，跟機附送一條由4粒大水晶砌成嘅手機繩，包括黃、藍、白、紅，再加上印有「Swarovski」字樣嘅銀色牌仔，拼埋部手機拎出街，真係極閃兼珠光寶氣！講到「閃」，必須一提機身設計，喺水晶隔籬，查實已裝上幾十盞LED燈，無論來電時、收短訊嗰陣，機身都會發出一道走馬燈效果，而且顏色次序、每次唔同，亦可自行設定，自由度頗高！

■由4粒大水晶合併而成，女仔一定鍾意。

變直身鏡化妝任照

SH5018C分唇唔算特別強勁，但叫做「基本套餐」樣樣齊，好似500萬像素鏡頭、QVGA靚芒、microSD卡等都無甩拖；但要留意，即使內置藍芽技術，但僅限於接駁無線耳筒，記者試過以Bluetooth掟相落另一部手機，發現佢唔支援呢種功能，最後惟有搵microSD卡代勞。另外須留意，SH5018C採用簡體中文介面，不設繁中字體，但好彩提供香港人熟悉嘅筆畫輸入法，打SMS都算方便；唔用嗰陣，佢仲會化身成一面鏡畀你化妝，真係幾搞鬼！