高鐵撥款通過後，政府過咗海就係神仙。菜園村村民其中一樣不滿嘅，係農作物、農具、廠房等賠償都未傾好，政府就入村收地，噚日有60幾人出中環，由立法會遊行去運輸及房屋局，控訴當局嘅農作物賠償，仲低過農民自己賣嘅價錢，甚至可以相差200幾倍。村民同支持者後日仲會舉行「蕉葉為誓、保衞菜園」大遊行，由銅鑼灣行人專區遊行去政府總部，更表明18號政府拆村，佢哋一定會抗爭到底。
政府稱根據文獻賠償
喺菜園村種有機蔬果嘅杜照強同八方講，佢最叻就係種有機菜，啲有機番茄可以賣到25蚊一斤，但政府就一呎地賠9毫子計賠償。菜園村關注組成員幫強哥計過，即係一斤番茄政府只係賠到一毫子多啲，同賣到嘅價錢差成227倍。強哥話，賠得咁少，根本唔夠佢搵另一個地方重新投資種菜，「重新拎個有機牌都要兩年，我呢兩年食乜嘢？再係咁落去，就嚟要拎綜援」。菜園村關注組成員Maggie整咗個表，比較蘆薈、粟米、木瓜等等農作物嘅賠償同賣價，反映政府個賠償方案離晒譜。村民話政府聲稱呢個賠償方案有文獻支持，但問係乜嘢文獻，可唔可以拎出研究吓，當局就話「無可奉告」。
村民更不滿，係今年2月22日佢哋已經表明要先建村後拆村，但撥款過咗咁耐，當局喺上月中先提出農作物賠償方案，10月28日先約村民傾方案可行性，雙方未有共識，當局11月4日已經帶300人入去展開第一輪收地。
呼籲市民同遊行護村
Maggie批評，政府畀村民嘅文件成100頁，頁頁雞腸，唯一嘅中文係農作物個名，農民冇可能半個月之內消化晒所有資料；最嬲係佢哋噚日出中環遊行，政府乘機入去收地，有三戶就咁被迫遷走咗。今日當局約咗村民開會，但關注組話冇乜期望，因為當局不嬲對佢哋嘅訴求充耳不聞。
大家可能仲記得，村民同支持者喺村口齊舉蕉葉以示保衞家園決心嘅畫面。佢哋呼籲，撐菜園村嘅市民呢個星期六「蕉葉為誓」參加大遊行，下星期四18日就入去合力護村，話畀政府知，乜嘢係承諾。
mailto:[email protected]