英格蘭一向問題國腳多多,「勾義嫂」泰利、「爛滾」朗尼、「爛賭」奧雲等等,下周三英格蘭喺溫布萊主場對法國嘅友賽,球隊相信又多一個麻煩友,佢就係近期入波入到唔識停嘅安祖卡路爾。
英格蘭當「弗」嘅前鋒呢排真係賣少見少,朗尼飛咗去美國「養傷」,戴倫賓特、迪科爾、森莫亞都有排唞,搞到領隊卡比路點兵都有困難,周三嘅英國《太陽報》就講,卡比路終於開綠燈,預計首度徵召安祖卡路爾入伍。21歲嘅安祖,喺場內嘅威力真係夠晒quali入選大國腳,周日幫紐卡素頂爆阿仙奴,已經累積6個入球,唔輸蝕得過貝碧托夫、杜奧巴呢啲頂級外援。以佢1米91嘅高大身軀,又着紐記9號球衣,被譽為「新舒利亞」真係當之無愧。
之但係安祖一把長頭髮,成個爛仔款,場外亦都唔喺好惹;之前就因為涉及打前女友,而家仲保釋緊,更被法庭規定要暫居紐記隊長路蘭家中,按慣例,足總一向都唔會選呢啲球員。周一慶祝擊敗阿仙奴,路蘭同安祖家中「開P」,3名應召女郎更涉嫌吸毒。入過冊嘅祖爾巴頓,就力撐安祖,巴頓講:「英格蘭唔好再考慮贊助商因素,要搵真正可幫球隊贏波嘅球員。奇雲戴維斯?好就好,不過已經33歲,冇將來o架啦!」連「真身」舒利亞都讚:「如果喺季初,我認為安祖入選太早,不過睇住佢一場比一場進步,又夠成熟,我哋唔好忽略佢。」
卡帥換血有望入伍
其實卡比路帶南非世界盃,已經被批評重用太多老將,結果世界盃後點兵,都想搵多啲新血,好似韋舒亞、加利卡希爾、梳爾哥斯等,都先後入選國家隊,紐卡素呢排咁勁,除咗安祖卡路爾,連23歲右後衞丹尼森遜,都盛傳入選,睇吓安祖卡路爾同丹尼森遜可唔可以把握呢次機會,一球成名啦!