聽日係孫中山誕辰144周年，國父孫女孫穗芳捐畀中大嘅孫中山銅像，噚日正式落戶逸夫書院校友徑旁嘅草坪，同將會命名為「逸仙樓」嘅第二學生宿舍高座相對。中大原本諗住聽日先舉行儀式，但孫穗芳話噚日係黃道吉日，「你看，今天太陽出得很好」。
民女擺放位置未有着落
中山像一度受新民主女神像風波牽連，被校方放喺貨倉，辣㷫孫穗芳。沈祖堯上任中大校長後，雙方經過近半年商討，終擺平件事。孫博士噚日唔想舊事重提：「現在很好了，完成了，我們過去不講了，今天很高興。」佢仲帶埋阿仔王祖耀出席儀式，介紹呢位孫中山外曾孫畀大家認識。
沈祖堯話，中山像比較重，要搵合適地方安放唔易，家呢個位置唔錯。至於「民女」像嘅永久擺放位置，學生會同校方仲未有共識，沈校長繼續好公關咁話，可以再傾。
明年係辛亥革命100周年，孫穗芳話屆時會再喺各地豎立多50個中山像，又希望內地同香港嘅學校多教學生認識孫中山嘅革命思想，確認孫中山嘅國父地位，將佢嘅三民主義作為兩岸和平統一基礎。八方都認為，學生要多了解孫中山推翻專制獨裁追求民主共和嘅精神。