熱錢擋不住，藍籌地產股成功連環抽水，都要多得市場資金肯畀面，從同類板塊地產發展股股價表現反映，市場根據歷史有理由擔心下一隻輪到新鴻基地產（016）亦無可厚非，配合股價見過高位147元已相當於較資產淨值折讓只有5%，亦解釋為何近日股價再上衝之際，反映資金承接力之成交已唔肯跟。
住宅樓寫字樓地舖頻現天價成交，令人好懷疑箇中究竟有幾多個「真」，香港呢個號稱「國際金融中心」，買賣樓舖都一樣淨係騷個成交價畀你睇到嘩嘩聲，之不過細節就唔容易畀你知，例如成交期有幾長、免租期又有幾耐，買方與賣方、業主與租戶之間有幾多關連，尤其用離岸公司嘅交易，都係無從稽考，外人得個估字，而好多人攞新高成交價嚟做指標追貨。
收租股價硬淨有原因
點解話佢哋儍？錢多未必人儍，俾經紀哄抬讚幾句就飄飄然簽約，連只得一厘甚至無Yield咁滯嘅盤都乖乖落叠仲唔係儍？
樓如果唔係買嚟住就係買嚟投資，寫字樓與地舖如果唔係買嚟自用都好少人會情願丟空等升值，即係會攞去出租，咁即係Yield大於一切，連租金回報率完全唔吸引嘅盤都搶，即係等於做生意不問回報，唔講回報嘅生意都肯做，不如順便當做善事！
唔好以為低息環境會直到永遠，樓價一旦下跌息口又一旦上升就隨時無得守，咁都視若無睹，仲唔係儍！不過講到儍，又儍唔得過銀行，銀行估價慣常按近期同類單位成交價行事，隨時俾揸住成倉貨嘅樓市莊家左手交右手舞高弄低嘅市場操控行為擾亂。
然而收租股股價表現硬淨係有原因，因為佢哋現價較地產發展股折讓更大，而且佢哋自己就唔愁無Yield，分到畀小股東個袋就算點小都應該好過家仲跳入樓市追價買樓收租，投資者想食盡收租佬嘅Yield又要擔保有租收，惟有買房地產信託基金（REITs），碰巧呢個禮拜有兩隻本地商場REITs公佈業績，字數所限，先行預告，明天再談。
胡孟青
作者為獨立股評人