個市去到家呢啲水位，唔知係咪已經炒到冇嘢好炒。平日冇咩郁動嘅現代美容（919）噚日都無端端勁升43%。咁啱公司同日宣佈拎到一個意大利美容產品品牌JeanKlebert嘅代理返嚟，4月先重出江湖做番主席嘅曾裕首次公開現身，華華梗係即刻問佢做咩股價係咁升啦！
點知曾裕好鬼風趣咁話，股價反應咁好可能係賀佢出山，兼且佢呢期搞緊抗衰老，專程染個紅色頭髮等自己睇落後生啲，所以人靚咗，搞到業績都靚咁話喎！現代美容早排先發咗盈喜，唔怪得曾主席咁風騷啦！至於個新代理品牌JeanKlebert，曾裕話未來一年計劃開10間舖，主要喺香港，慢慢再喺其他東南亞地區發展。
李華華