立法會噚日為最低工資一錘定音，估計有31萬打工仔有人工加，雖然華華冇份，但係都戥佢哋高興。喺呢個香港打工仔笑晒口嘅日子，原來遠在經濟唔多掂嘅花旗國，亦有企業宣佈大幅加薪一成，邊間企業咁有良心？咪就係網上搜尋器一哥Google囉！
加幅劃一 個個係人才
《華爾街日報》收到料，話I.T.業人才競爭非常激烈，為咗挽留人才，Google決定明年1月起加薪一成，全球2.3萬個員工，劃一加幅……咦，人人都加薪一成，咁咪即係個個都係人才囉！Google行政總裁施密特話，今次加薪除咗想提高員工士氣，亦想員工知道努力工作係有回報嘅，從而吸引更多有料人士加盟。
據了解，Google今次出手咁闊綽，主要因為公司同I.T.界新貴Facebook爭得好犀利，於是要加薪留人。事實上，Google叫得做一哥，入得去做嘅自然個個有番咁上下，結果公司唔少叻人俾Facebook撬走，Google為免夜長夢多，於是大灑銀彈留人，都啱嘅！
唔講唔知，Google為咗留人，最近仲嘗試根據員工評核等因素，利用數學程式計算邊個員工最想走，等公司有所準備。華華心諗，如果Google犀利到識得整條方程式估邊隻股會升，咁就發達囉！
星展、渣打招兵買馬
噚日對打工仔嚟講真係吉日，除咗有加薪佳音之外，仲有招聘消息㖭！話說星展喺葉約德卸甲之後，龐華毅隨即接任星展香港行政總裁，呢位老外新官上場，銳意招兵買馬，計劃出年增加香港嘅員工人手兩成，中國嘅人手更加話要翻一番。無獨有偶，渣打（2888）都話要喺未來兩年，喺東南亞增聘最多4000人。金融界嘅音樂椅響過不停，唔想自己間行人手大執位，各位管理層要識做啦！
李華華
mailto:[email protected]