香港人，精神分裂。每日勁講「死」字，偏偏面對真正死亡卻震騰騰，處理身後事態度亦是儀式人有我有。黃偉文為《小團圓》填詞：「誰的書寫到盡處居然會如願？」我想，至少臨終時能如願一次，正如忠Sir已計劃兩腿一伸後，由hip-hopdancers送自己上路，以笑聲謝幕。
記者：蔡俊業
攝影：楊錦文、陳盛臣
Model：RickandSenior@MoveDanceStudio（34811868）
鳴謝：詩人黑盒劇場
妻友跳舞送陪上路
大膽，死後竟然不設靈、不打齋，還要請人跳hip-hop送自己一程？認真大吉利是！但忠師傅一於少理，堅決按照自己心意，計劃兩腳一伸後直接運往火葬場，骨灰置於家中，前方擺個香爐，搞掂！「朋友得閒可以上嚟裝炷香，咁樣可以慳番好多錢，我覺得若要花咁多錢去搞白事，不如捐畀有需要嘅人，臨走做番件好事仲有意思！」忠師傅戴鴨嘴帽，叼着香煙，聲線低沉雄渾，直言父母屬超級傳統型，小時接受傳統武館訓練，長大後執掌舞獅隊教鞭，以為皮囊下思想守舊爆燈？忠師傅用行動證明各位誤會了，他於千禧年後首創hip-hopcrossover舞獅表演，面對死亡，他亦以hip-hop為喪禮形式，因他認為道教喪葬儀式破地獄中，喃嘸師傅會有走步、轉身、噴火、破瓦等高難度動作，過程猶如街舞表演，「又熄晒燈又跳晒舞，完全係中國嘅Number1hip-hop，不過無得拍手掌！所以我諗若改跳hip-hop都幾過癮，但邊個會俾我咁做？除咗我自己！」怎能確定願望實現？幸好還有妻子和一班死黨陪他一齊癲，「有十幾個朋友都跟我有同一種思想，佢哋思想破格，只要落定order，開心送我一程。」不過，很難想像在殯儀館內跳hip-hop吧?!「我估殯儀館都唔會俾我咁做，所以要搵一個地方搞追思會，有人跳舞，成班人開開心心，唔好喊苦喊忽！」
首要尊重先人遺願
朋友對我說，將來的葬禮場內要播Madonna和LadyGaga的歌。說跳hip-hop有違傳統？提供一條龍善終服務的公壽中西殯儀，第四代傳人兼總經理駱敏儀謂，葬禮內容可以很自由，最重要是按照先人生前意願，她未曾聽過有客要求在葬禮跳hip-hop，「反而試過播鄧麗君、英文歌或heavymetal音樂。」亦有客人的要求令駱小姐感驚訝。她說曾有家屬安排海葬父親，「佢哋話成家人撒完灰後，要去另一處遊船河、玩快艇同食海鮮，我話咁都得？」原來是逝世父親生前愛熱鬧，早已指明要這樣做。所以，葬禮不一定要呼天搶地，也可以平和地或開懷地去懷念已逝者，大前提是尊重亡者遺願和參考先人背景。不過駱小姐直言，很多香港人辦理身後事都忽略這一點，「上一代因為老人家知道做咩代表咩意思，儀式需唔需要做。家好多時家屬嚟到就話要拜神、打齋、燒衣紙，總之人家點做就點做，其實有無諗過自己需要乜？考慮死者感受？係咪一定要破地獄呢？可能死者怕嘈吵怕鑼鼓！」她說會先和家屬詳細商議，包括了解事主家鄉所在，決定祭品種類、葬禮儀式內容，可以是歌頌先人生前的貢獻，或邀請摰友分享先人生活點滴，「以前到殯儀館成日見家屬哭哭啼啼，但我見過有親友見到舊相後，發出笑聲。」
瞓得舒服
本港葬禮使用的棺木主要分中式及西式兩種，中式的以前以柳州杉木最矜貴，現時產地多為廣西深山，主要以柏木、樟木及楠木最矜貴，中式棺木價錢由萬多元至幾百萬元不等。西式則以桃花木心、橡木、楓木及桃木為主，價錢視乎紋理及焗製工序，由數千至十幾萬元不等。
新式骨灰龕
為自己收拾爛攤子
駱小姐說，人生最後一程如能在生前好好安排，可避免很多無謂爭拗。今年61歲，人稱「肥姨」的程麗鶯，去年便為自己的身後事打點妥當。肥姨與丈夫無兒無女，兩年前丈夫因病去世，家中便剩下她和一隻養了十多年的狗，「我先生死咗100日後，隻狗就出事，我抱佢去睇獸醫，醫生話佢身體虛弱，叫我放低俾佢打針，但我唔忍心；打電話聯絡愛護動物協會，誰料對方說：『未死就攞去打針，死咗就交去垃圾站啦！』我聽到後好心罨，做唔到！」肥姨央求狗仔給予多一點時間，讓她可以準備身後事，一個半月後，狗仔過身。最近她發現自己有黃斑點病變，令她想到有為自己處理身後事的必要。「狗仔死咗仲有我呢個主人去搞，將來我死咗點算？將個爛攤子交畀親友?!」去年她參加了聖雅各福群會的「後顧無憂」計劃，表明死後不通知任何親友，直接將遺體送到火葬場火化，然後將她和丈夫的骨灰混合一起再移到墳場內的紀念公園撒灰，到時會進行簡單送別儀式，還會安排旅遊車接載親友觀禮。人出生時沒得選擇，反而可選擇怎樣走最後一程，不是一件快樂事嗎？
作劇思念阿嫲
死亡，一個充滿思考和矛盾的命題，逝者冀望存活者能開心送他一程，但面對永遠的離別，你能笑得出嗎？舞台劇演員黃詠詩自小入讀天主教小學，卻生於「打齋」世家，太婆做問米，太公做道長，爺爺繼承父業，但阿詩的父親卻認為「打齋」生意有騙死人財之虞，情願出國行船，加上兄弟姊妹眾多，關係疏離。直至4年前祖母過身，才知祖母來頭不小，於行內德高望重，行內人尊稱他們為「大師公」和「大師母」，「最後嘅儀式上，有差不多100個唐裝師傅一齊向阿嫲鞠躬，加埋我哋家有80幾人家屬謝禮，好似黑社會咁。」不過在阿詩眼中，此情此景只是「做戲」，因阿嫲臨死前幾年都是在寂寞中度過。「嗰幾年都無乜親友探佢，但佢一死就有幾百人做咁大堆嘢，我想話咁做係無意義，應該珍惜同佢生前嘅每一刻，而唔係死後去做。」為此，她從「破地獄」的儀式中尋找靈感，創作《破地獄與白菊花》，劇本包含「破地獄」和「遊十殿」等葬禮儀式的背後意思，也借白菊花寄託對阿嫲的思念。「破地獄儀式好似好悶，其實係有意思，先人死後要走過咁多個地獄，就係希望後人要好好活下去。」
《破地獄與白菊花》
日期：即日至11月13日
時間：8pm，13日3pm
地點：藝術中心壽臣劇院
票價：$220、$180、$150
Q&A 家中都可放骨灰
Q：記者
A：殯儀業人士
Q1：香港還有沒有土葬？年期上限是多少？
A：有，申請食環署土葬，收費$3,190，以7年為上限（金塔地則永久租用，收費約$6,000）；華人永遠墳場一般10年期，收費為$21,600，如續期須付$29,600（包開塚費），永久則約$280,800（包開塚費），視乎土地供應，未計私人土葬場地。
Q2：是否任何地方都可舉行葬禮？
A：不，須要到指定地點，包括殯儀館、醫院或教堂舉行，部份新界鄉郊及離島則容許任何地方，但要按照衞生條例，必須封棺。
Q3：人死後的基本收費是多少？
A：主要分兩類，在醫院身故後直接送火葬或落葬，一般需萬多元，視乎棺木價格。若要租用殯儀館，基本花費2至3萬元。
Q4：在公園撒灰及海葬收費多少？
A：在公園撒灰及海葬毋須收費，在市區及新界區紀念花園設置紀念牌匾的許可證費用，每塊分別為90元及295元（不包購買及安裝牌匾費）。
Q5：骨灰安放家中有否問題？
A：沒問題，惟放在家中容易因搬屋而遺失或令骨灰龕破損。
如何辦理身後事？
1.逝世後遺體舁送殮房等候處理，由主診醫生簽發死因醫學證明書，若選擇火葬者需同時索取醫務證明書。
2.家屬需於事主死後24小時內，以上證明書、死者身份證及申請者的身份證到金鐘、灣仔及長沙灣3間死亡登記處登記，查詢網址： http://www.gov.hk/tc/residents/immigration/bdmreg/death/address/
（註：上述資料適用於自然死亡個案，如非自然死亡，遺體會舁送至公眾殮房，家屬需認屍，還要待死因裁判官裁定死因後才能進行死亡登記。)
3.辦理死亡登記後，攜同死者身份證及土葬准許證購買墓地及繳費。
4.確認及領取遺體後，辦理殮葬及出殯事宜。