香港樓市㷫烚烚，但對於身經百戰嘅歐洲股神安東尼．波頓（圖）嚟講就無有怕，仲豪擲7280萬蚊買咗Mayfair豪宅做新居，等佢日日起身都可以俯瞰成個維港海景，都咪話唔爽。
唔知係咪朝朝望吓海景，個腦都會精明啲，波頓嘅中國特別情況基金自4月開辦以嚟，未夠7個月已經有27%回報，其中佢揀嘅聯邦制藥（3933）同華晨（1114）更加自年初以嚟爆升近3倍，成績非常標青。睇返隻基金嘅9月份十大持股，除咗上述兩隻，仲有聯通（762）、中移動（941）、中行（3988）同騰訊（700）等。
其實波頓本來已經收山，今次肯出山重掌呢隻基金，都係為咗「中國」呢兩個字，佢為咗向投資者表明心迹，更加真金白銀攞咗成250萬英鎊（大約3115萬港紙）出嚟，投資落自己隻基金，呢筆數仲破咗佢歷來投資自己基金嘅紀錄㖭。
李華華