獅城實試Forester　大鱷出洞

獅城實試Forester　大鱷出洞

聞SubaruSTi同Wagon車款賣得實在太好，搶晒其他車款嘅焦點，其實另一款主打越野性能嘅Forester，一樣可憑AWD全時四驅優勢，劈盡泥地碎石凹凸爛路，跑在新加坡市區靚路，更如大鱷出洞，見一架嗒一架！

記者、攝影：徐影龍
鳴謝：MotorImage

全時四驅發揮狂野

想平玩四驅越野Feel，港人通常只揀城市四驅車種，正所謂唔打得都睇得，但Subaru架Forester2.5XT，廿零萬車價居然畀到你癲狂嘅越野性能。嚟到新加坡試車，諗住最多係坡妹，基本上成個城市都無乜山坡，要玩越野off-road原來一樣有計！
就喺MotorImage總部頂樓，專登佈置成各式各樣嘅越野環境，小小地方已有齊鬆軟泥路、碎砂碎石、凹凸爛地等，車速唔快但揸同坐都感受到off-road嗰種惡劣路面，雖然震到我副老骨頭散晒咁滯，不過Forester憑住Subaru全時四驅DNA，遇到邊個轆離地欠缺抓着力，即自動分配動力至其他車轆，令到車身更有Power逃離險境，AWD比普通4WD更實用，就算澗溪爬草都無問題，活像一隻兩棲大鱷咁有勁度。

■睇位輕鬆，穿狹窄山洞輕而易舉。

■在砂石上急行（左），無跣胎搖擺出現。慢行凹凸石春面（右），車內搖晃度亦不算大。

公路爆Turbo夠暢快

玩完越野就出街周圍逛，先由總部ToaPayoh出發，行6公里到牛車水同小印度，呢兩個出名周街DoubleParking嘅地方，揸住大鱷一啲都唔輸蝕，憑住高身易睇位優點，幾窄嘅路、幾難拗嘅彎都相當輕鬆。大鱷「淺水」嬉戲一會，再兜MarinaBay睇摩天輪，叫做感受過一級方程式賽道嘅部份路段。
屈咗大半日，當然要畀個Turbo伸展吓，之後直插東岸，唔係去珍寶食白胡椒蟹，而係貪佢外圍近10公里又直又闊嘅快速公路。加大油門，渦輪增壓應聲而起，TurboLag唔算明顯，推背感亦相當快速湧現，毋須轉+/-模式，波箱已迅速配合不斷升檔，最重要係星洲司機普遍斯文守規矩，大多依住中線而行，快線變得暢通無阻，令230匹馬力發揮得相當淋漓盡致。Subaru嚟到四驅SUV，原來一樣咁好玩。

■估唔到新加坡繼最新金沙空中泳池後，原來「空中劈泥」一樣咁刺激！

1.天窗比好多歐系同級車更大，開揚感十足。

2.後排坐三人仍尚算闊落，最正是座椅如梳化般軟熟。

3.毋須摺低後排座椅，尾箱空間已足夠放兩個大篋。

4.車廂佈局配襯順眼舒服，廿幾萬車價絕無入門車的膠感。

引擎：2,457cc水平四＋Turbo
馬力：230ps/5,200rpm
扭力：32.6kg-m/2,800rpm
傳動：4前速自動波　全時四驅
售價：$269,985
查詢：25112727（Subaru灣仔陳列室）

■MotorImage總部頂樓居然佈置成越野格局，可以盡情地玩。