中國老一輩一聽到喪葬殯儀，就會即刻彈句：「啋！大吉利是咩！」做呢行嘅人更加行事低調，費事俾人話發死人財。不過，世事無絕對，中國生命（8296）主席劉添財就好理直氣壯咁講：「賺死人錢有咩唔啱。」華華聽落係覺得有啲礙耳，但係諗深一層又合理喎，死亡同交稅都係無可避免嘅，百年歸老都想告別式搞得好好睇睇，又可以減輕親人嘅悲痛，呢啲錢係要俾人賺嘅。
似婚禮般播回憶片段
劉添財話，只要同佢哋簽生命契約──即係預繳喪禮計劃，畀4萬2千元，就包設靈、火化同安葬等一條龍服務，仲會有生命回憶錄，將平時嘅生活點滴，例如食大餐時影低嘅餸、去旅行時玩自拍嘅相、放上Facebook嗰類網站嘅，全部都可以畀晒佢哋整隻回憶光碟，就好似時光倒流咁，將生前美好嘅回憶放喺靈堂度，show俾人睇。
咦，咁咪可以大玩touching位，好似婚禮將對新人由細到大嘅相重溫一次咁，感動到屋企人同班friend喊晒囉！
劉主席話公司想提升香港嘅殯儀服務，嚟緊仲會有唔少新嘢係業界未有嘅，希望開拓一條新路，最緊要係將呢個神秘行業透明化，樣樣服務嘅收費明碼實價。
去得安樂 賺得快樂
嘩！咁咪好易砌低本地殯儀業，而且簽咗生命契約仲抗埋通脹㖭，無論第時經濟好唔好景，都唔會加價，越後生買就越着數，總之去得安樂，公司都賺得快樂！至於骨灰龕位個價係咁升，中國生命就暫時無準備踩入去，管理層話要慎重考慮，但係絕對有條件去做喎！
李華華
mailto:[email protected]