李超人之前話過，「私有化」呢個名詞，喺香港係負面嘅，不過華華喺噚日工銀亞洲（349）有關私有化嘅股東特別大會上，就感覺唔到呢樣嘢，問親在場股東，個個都話贊成私有化，不知幾和諧。
其中一名黃姓長情小股東（圖），話自己8蚊買咗幾萬股工銀，以工銀29.45元嘅私有化作價算一算，嘩，呢位小股東咪可以套現成幾十萬？雖然佢覺得家股市升咗咁多，呢個私有化作價無當初咁吸引，不過佢話私有化畀到佢套現換馬嘅機會，至於換邊隻？呢位黃股東心儀大新銀行（2356），皆因寄望下一隻會輪到大新私有化喎！佢話如果大新要私有化，2.2倍市賬率係合理估值。
李華華