國際熱錢睇好新興市場，國際大鱷索羅斯（圖）更加睇好中國「新興城市」。今個月1號，索老啱啱攞到證監會嘅資產管理牌照，可以喺香港大展拳腳；4號佢嘅大仔就已經殺到大陸重慶實地探路。重慶市外經貿人士話，大鱷睇好大陸三個城市：北京、重慶同杭州。
參觀龍湖地產樓盤
今次索老派出大仔羅伯特．索羅斯，同跟咗佢9年嘅戴霽欣出馬，兩人分別係SFMHK（香港索羅斯基金管理公司）嘅副董事長同中國投資董事，索老對重慶嘅重視程度，可想而知。兩日嘅行程，佢哋拜訪咗市領導、政府部門同公司，羅伯特仲親自去咗龍湖地產（960）嘅項目。重慶市外經委人士話，索老對基礎設施等政府類項目等幾有興趣。羅伯特仲好明確咁話，嚟重慶，就係為咗搵投資機會！
李華華