特區首長選舉大戰，今個星期五風起雲湧，疑似候選人行會召集人梁振英（CY）會到中大逸夫書院做通識課演講嘉賓，睇一睇演講題目，八方相信好多人精神為之一振，因為梁振英以「確立願景、收窄分歧、凝聚共識──政治領袖的責任」為題，梁振英似乎唔只係熱身階段，已經進入作戰狀態。
呢個題目可以在通識課講，亦可以視為政綱大題目，甚至係向其他對手下戰書，總之當日梁振英發表宣言，大家密切留意。講開又講，被關愛基金搞到一頭煙嘅政務司司長唐英年，正為擺平反對聲音而密密做工夫，有人同八方講，願意無料（免費）奉送好橋畀司長，既然外界質疑呢壇嘢係「競選基金」，一於搵齊CY、范太、葉劉、鬍鬚曾、梁家傑等疑似候選人一齊撥錢，以示大公無私嘛。