蔡卓妍（阿Sa）上個月高調同陳偉霆（William）宣佈拍拖，點知被人話佢未同前夫鄭中基（Ronald）搞好離婚手續，仲未搣甩鄭太身份就去媾仔。噚日阿Sa同鍾欣桐（阿嬌）喺中環戴住百萬珠寶、仲有谷胸鍾舒漫及泳兒幫公司英皇珠寶示範新款首飾，阿Sa俾記者捉住問，佢依然死撐話：「總之我同Ronald一早已搞好法律上嘅嘢，我唔係鄭太，係蔡小姐，我同Ronald分開已經年幾，法律上要我哋做嘅已經做晒。」
答案含糊
係咪同William拍拖前已經係蔡小姐？阿Sa就答得好含糊：「總之做晒法律上嘅嘢，已搞清楚大家嘅關係。」咁究竟幾時回復蔡小姐身份？阿Sa迴避話要交代嘅已交代晒，所有法律程序亦都做妥，但係馮仁昭就記得Ronald上星期回應離婚一事，仲話技術嘅問題要技術處理，咁即係未完全搞掂，有瞞婚前科嘅阿Sa公開話已回復蔡小姐身份，睇怕都係想維護William。
阿嬌認衰
至於阿Sa好姊妹阿嬌，之前喺微博加把口話阿Sa唔講離婚原因已係仁至義盡，噚日阿嬌即刻認衰話：「我自己諗啫！」咁究意阿Sa有冇俾Ronald辜負過？阿Sa話：「我同佢喺記者會已講晒，冇其他想講，希望大家開心幸福。」阿Sa又話知道William面對好大壓力，自己就未有心理準備迎接另一段婚姻。