天生我才，人肉錄音機都有機會廢物利用。政制及內地事務局局長林D9噚日探訪香港國際社會服務社嘅少數族裔人士支援中心，同中心內少數族裔人士傾談，了解佢哋需要。
據講林D9對少數族裔人士學廣東話特別感興趣，仲即場考驗在場人士嘅廣東話水平，中心話「歡樂氣氛令局長流連忘返」。學習語言最緊要係多聽多講，八方覺得少數族裔人士今次真係行運，竟然見到宇宙最強勁嘅人肉錄音機，聽住林D9反反覆覆講同一番說話，三個月學識外語嘅靈格風都甘拜下風啦。
有個久居香港嘅印度人士就向林D9投訴，話每次去大陸過關時都要排好長時間隊，因為佢持過境簽證，唔係回鄉卡，希望港府能想辦法縮短等候時間。林D9即場冇表示，只係叫助手記低單嘢，可能要慢慢搞。