資金入市，雖然源源不絕，大市氣勢，雖然火紅火綠，但大升之後，調整亦在所必然。連升6日後，昨日大市終於出現回吐，恒指收24710，跌253點，交投依然暢旺，有1166億元。
港股今個大升浪，由5月25日的18974起步，到前日的24988點，足足升咗6014點，維持咗5個多月，若調整番一千幾百點，亦好正常，以回落0.236倍計，恒指可見23568，亦即跌番1420點，極其量回落0.382計，恒指亦只下跌2300點，估計調整市會維持一個月或到年底，跟住又再大升。
大市第一日掉頭，市場氣氛仍然好熱熾，上升正股就超過520隻，未來市勢雖然進入整固期，但會繼續個別發展，早輪大升市主角的藍籌同大價股會回氣，但落後的三四線股會趁機接力而上，股民不愁無用武之地。
第二大股東換人
銘源醫療（233）同上海醫藥建立戰略合作關係，泊到大碼頭，當堂聲價百倍，連升6日，昨日最高1.40元，收1.36元，升7仙，成交更大增到1.53億股，熱力澎湃。上月19日推介銘源，當時股價1.02元，上升目標1.60元，短短3個禮拜，累積升幅已33%，可以上移止賺位繼續持有。
今日要推介一隻基金股，就係滙源果汁（1886），中線持有，可賺幾成，甚至一個開。通常基金收集一隻股票會好有耐性，就以滙源為例，由去年9月開始，股價在5至6元間上落，橫行咗一年多，即使今年7月有新基金上車，股價都只係升得幾日，又見有無形之手㩒番住。到咗今個月，股價開始由低位回升，而成交亦縮到好少，有迹象顯示大戶收集已完成，升浪隨時會起動。
滙源第二大股東「換人」，軟銀賽富「登場」，入股價為6元，比市價有溢價10%，持股22.98%，仲話過唔排除增持嘅可能性，對前景有十足信心。滙源股價現時已重上10日線之上，20日、50日、100日同250日都在5.40至5.53元水平，一衝破，大升浪就確認，初步在6元會有阻力，整固後再上，可見8至9元。
郭兆誠