中國嘅民主運動，同平反六四一樣最重要薪火相傳，有年輕人接棒。家喺台灣教書嘅前學運領袖王丹好有呢個先見之明，早前同訪台嘅社民連代表團傾呢個問題時，都話可以考慮一齊合辦「網上民主大學」。據同王丹接觸過嘅季詩傑引述王丹稱，佢可以用自己嘅人脈網絡幫手搵人授課，例如民運人士王軍濤等都係合適嘅人選。
籌辦呢間網上大學主要目的，係要令年輕一代更加了解中國民主發展，佢哋正積極爭取美國嘅大學承認有關學分，但相信就算有此誘因，報讀嘅都應該會以有興趣到美國升學嘅台灣學生為主喎。至於王丹點解揀同社民連而唔係支聯會合作？季詩傑相信係因為佢都知道網上運作呢家嘢，社民連強好多。