王菲昨日專程返港，為多年戰友、化妝師阿Zing的慈善相展站台宣傳。復出後氣勢一時無兩，殺盡中港台三地的Faye，昨日在港一展其天后架子，在活動上惜言如金，拒做訪問，影相只限五分鐘，影大合照更姍姍來遲，要一眾女星如劉嘉玲、舒淇、葉蒨文等在台上呆等。
星級化妝大師阿Zing推出新書及舉行慈善攝影展「TheMostBeautifulWomeninHongKongwearZing」，昨日傍晚在中環IFC舉行酒會，Zing的殿堂級女星如王菲、劉嘉玲、舒淇和李美鳳等傾巢而出，吸引了過百記者採訪。
王菲剛在北京完成演唱會的首站行程，昨日抽空出席慈善相展，不過大會事先表明王菲不接受訪問，盡顯天后地位，她穿了一身Celine冬裝配金鏈，化上淡妝現身，只是在台上影了三分鐘相，全程木無表情兼cool爆，之後就閃入VIP位，離開了記者視線後，王菲似乎即時心情靚晒，同人有講有笑，兼不停手發微博和友人吹水。
舒淇狠斷舊情
到影大合照時，劉嘉玲、葉蒨文、舒淇、何超瓊等一眾女星名人已在台上企好，但王菲等極未埋位，眾人都有點不耐煩，而司儀鄭丹瑞都不停開咪催促「阿菲、阿菲」，更忍不住寸說：「乜IFC好大咩？」之後，王菲才姍姍來遲埋位影了兩分鐘相，一影完又閃回樓上的isola餐廳傾偈。
此外，舒淇之前自爆與黎明分手受情傷後，與張震合演《最好的時光》時情緒崩潰而抑鬱多時，她昨日解釋是大家文字上誤解了，她只是抽離不到角色：「我唔係咁嘅意思，我係話我喺戲入面，行入咗個角色，成個人抑鬱病咁，抽離唔到，要多啲時間先抽離到。」問舒淇當時感情可是也要時間抽離？她有感而發說：「要投入先，可以一齊就最好，應斷則斷！」
採訪：顏英儀、溫敏芝
攝影：林德雄、黃偉雄
阿Zing推出新書《TheMostBeautifulWomeninHongKongwearZing》，表揚他眼中最漂亮的20位女性，當中包括王菲、劉嘉玲和朱玲玲等。
