特區出年踏入選舉年，2011年先有區議會及選委會界別分組選舉，2012年就有特首同立法會選舉兩場重頭戲，連煲呔早前講堆填區風波時都暗示嚟緊嘅選舉非常激烈，可見呢幾場世紀大戰幾咁令當局疲於奔命。
政制及內地事務局體諒選舉事務處要喺兩年內搞四次選舉好吃力，建議喺選舉事務處開設一個為期26個月嘅首席行政主任編外職位，專責監督同規劃選舉工作，例如展開大規模選民登記運動、更新選民資料，以及檢討選管會選舉活動指引等，確保喺2011年11月至2012年9月唔夠一年內，四大選舉順利舉行，每年平均員工開支總額會因此增加約160萬。