日本導演中島哲也改編同名小說、喺香港上映緊嘅日本電影《告白》，除咗有機會代表日本角逐明年奧斯卡金像獎最佳外語片之外，截至前日喺香港上映25日，票房已經累積至982萬，按單日收27萬嚟計，《告白》肯定會衝破千萬大關。相對同期上映嘅電影《抱抱俏佳人》，18日收588萬，《猛火爆》收196萬，《幻險巴黎：美女．魔龍．木乃伊》嘅96萬，《告》片可謂非常突出。
角逐奧斯卡
《告》片有咁好成績絕對唔係僥倖o架，套戲上映嗰陣已經有大把網友爭住討論，除咗故事出色，女主角松隆子嘅破格演出亦係一絕。佢喺片中飾演初中女教師，知道四歲女兒喺校園溺斃原來唔係意外，毅然向全班同學宣佈復仇計劃，佢演繹嗰種冷血神情，真係睇見到心寒呀，唔怪得呢部戲有機會角逐奧斯卡嘅最佳外語片入圍資格啦。
其實近幾年日本電影喺本地嘅成績都唔錯o架！好似改編自漫畫書嘅兩集《死亡筆記》同《爆粗band友》、本木雅宏主演嘅《禮儀師之奏鳴曲》，福山雅治演出嘅《嫌疑犯X的獻身》全部都有過千萬票房，絕對唔輸蝕。